Duha ka bagyo gipaabot sa Hunyo

Duha ka mga bagyo ang gipaabot nga moigo sa nasud sulod lamang niining buwana hinungdan nga nangandam na ang Regional Disaster Coordinating Council ug nagsugod na og monitor sa mga lugar nga peligroso sa landslide ug baha.

Ang tigpamaba sa RDCC Neil Sanchez mi-awhag sa publiko nga mangandam nang daan sa maong mga adlaw gikan sa pagkaon, limpyong tubig, medical kit ug uban pa.

Ang RDCC subling miluwat ning maong pahimangno human sa gipagawas nga pahibawo sa Mines and GeoSciences Bureau (MGB) sa mga barangay dinhi sa dakbayan ug lalawigan sa Sugbo nga peligro sa landslide nunot ning pag-abot sa ting-uwan.

Ang MGB mipahibalong dunay 46 ka barangay sa siyudad sa Sugbu ug sa probinsya ang nakit-ang daghang mga liki sa yuta ug peligrong mag-landslide ini og sugod na sa La Niña nga magdala og daghang ulan.

Tambag ni Sanchez ilabi na niadtong mga molupyo daplin sa sapa ug mga bakilid nga bahin sa bukid pagpangandam kanunay ug mas makaayo kun temporaryo silang mobakwit ngadto sa mas luwas nga dapit ini og sugod na og bunok sa uwan.

Gi-awhag sab niini ang mga LGU’s pag-activate sa local disaster teams niini aron makatubag dayun 24-oras kun dunay mga motumaw nga kalamidad.

Gimanduan sab ang mga lokal nga kagamhanan nga magbutang daan og dapit nga himuong temporary relocation sites alang niadtong mga pamilya nga pabakwiton nga nahimutang sa lugar nga peligroso.

Si Oscar Tabada sa Philippine Atmospheric Geophysical and Astronomical Services Administration sa Mactan mipahibalong duha ka mga bagyo ang mosulod dinhi sa nasud karong bulana.

Sa nanglabay’ng mga adlaw nga nasinati ang uwan miabot na kini og 78 millimeter nga maoy sukdanan aron matawag nga nagsugod na gyud ang ting-uwan.

Dugang pa ni Tabada nga ang buwan sa Hulyo ug Agosto gikonsiderar nga typhoon season o panahon sa ting-bagyo, pagka-Septiyembre adto motugpa ang bagyo sa Northern Luzon ingon man sa Bicol Regions ug makaapekto gyud sa Central Visayas area ang kusog nga hanging habagat.