Oponganon maghiusa

CEBU, Philippines - Si Mayor-elect Paz Radaza sa dakbayan sa Lapulapu miawhag kagahapon sa mga Oponganon nga maghiusa kanunay alang sa kalampusan sa dakbayan.

Ang maong awhag gipalanog ni Radaza atol sa pagsaulog ug paghandom sa dakbayan sa ika-112 ka kasumaran sa Adlaw sa Kaugalingnan kagahapon sa buntag.

Sa iyang pagpamulong gipasabot ni Radaza nga dili karon panahon sa pamolitika ug ang panaghiusa maoy gikinahanglan sa tanan aron magmalambuon ang dakbayan.

 Matud niya nga angay nang kalimtan ang mga nahitabo sa miaging piniliay ug kinahanglan nga maningkamot ang tanan ug molihok ilabi na ang mga empleyado sa kagamhanang lokal sa dakbayan sa Lapulapu kinsa nagkadaiya og baroganan sa milabay’ng piniliay.

Midugang siya nga mas maayo nga ang tanan motrabaho ug moserbisyo sa katawhan nga gawasnon ug walay gikahadlokan nga maoy diwa sa gisaulog nga Adlaw sa Kagawasan o Kaugalingnan.

Ang maong kalihukan gitambongan sa mga bag-ong napiling opisyal sa dakbayan sa Lapulapu nga gipangulohan ni Vice Mayor -elect Marcial Ycong ug mga konsehal, mga sakop sa Philippine Air Force, NAVAL Forces Central, PNP Lapulapu, BFP Lapulapu, CTMS, DepEd Lapulapu, Lapulapu City College, Muslim Community Officials ug mga kawani sa kagamhanang lokal sa dakbayan sa maong dakbayan.