'Drug pushers' sa Danao sikop
CEBU, Philippines - Duha ka giingong drug pushers sa syudad sa Danao ang nadakpan sa gipahigayong buy-bust operation sa Provincial Investigation Branch (PIB), Philippine Drug Enforcement Agency (PDEA) ug kapolisan sa Danao kagahapon sa kaadlawon sa dalan Oliver barangay Poblacion.
Ang nasikop mao sila si Florencio Deretcho Almerez alyas Jong-jong, molupyo sa dalan Oliver sa barangay Poblacion ug si Melchor Hermocillia Enriquez alyas Bongot, molupyo sa sitio Pulang Yuta sa barangay Looc.
Base sa imbestigasyon sa kapolisan, dugay nang gipailawom sa surveillance ang duha human makadawat og impormasyong nalambigit sa pagpamaligya og illegal nga drugas sa maong lugar.
Kagahapong adlawa gipahigayon ang buy-bust operation ug napalitan sa poseur buyer og usa ka paketeng gidudahang shabu ang duha.
Nakuha usab diha sa posesyon ni Almerez ang usa ka kalibre .38 rebolber nga adunay upat ka buhing bala.
Ang kapolisan nakasakmit og upat ka medium pack sa gituohang shabu, duha ka tag P500 ug laing upat ka P100, onse ka aluminum foil ug uban pang drug paraphernalia.
- Latest
- Trending
