'Suspek' pagpusil sa German nadakpan

CEBU, Philippines - Nasikop sa mga sakop sa Investigation and Detection and Management Branch (IDMB) ang usa ka lalaking giingong naghupot og armas ug maoy gipasanginlang mipusil sa usa ka German duha na ka bulan ang milabay sa barangay Inayawan.

Ang nasikop mao si Estomago Ordiñez, 50, taga barangay Cabangcalan II barangay Bulacao kinsa nakuhaan og kalibre .45 nga armas human kini gisumbong nga nagdala-dala og armas.

Base sa pakighinabi sa The Freeman sa hepe sa IDMB, Sr. Insp. George Ylanan, mibutyag kini nga mipahigayon sila og operasyon sa gawas nga bahin sa panimalay sa suspetsado human nila madawat ang usa ka taho nga adunay armadong tawong nagduwa og chess nga nagdala og armas.

Tuod man dihang ilang gipanid-an nakit-an nila ang suspetsado nga naghupot og armas hinungdan nga ila kining gisikop.

Samtang usa sa silingan sa suspek ang mitug-an sa kapolisan nga si Ordiñez maoy mipusil kaniadto sa German nga si Zarko “Freddie” Ljiljak nga negosyane og fashion jewelries.

Apan ang suspetsado kusganong mihimakak sa maong pasangil kalabot sa pagpamusil sa langyaw.

Kasong kalapasan sa illegal possession of firearm ang isang-at sa taga IDMB batok sa suspetsado samtang ang taga Homicide Section nagtuon na sa ebidensya ug sa mga pamahayag kabahin sa posibilidad nga pagpasaka og kasong frustrated murder kabahin sa nahitabo sa German.  (BANATNEWS)