Gitiwasan!
CEBU, Philippines - Naglunang sa kaugalingong dugo ang usa ka giingong ‘ex-convict’ human kini gipaulanan og bala sa wala mailhing lalaki pasado alas-9 sa miaging gabii sa barangay San Roque ning dakbayan.
Ang biktima nailhan nga si Joseph Canoy Uba-ob, 25, nagpuyo sa eskina sa dalan Lapu-lapu ug Legaspi Sts. sa barangay San Roque samtang ang mga mamumuno giingong duha ka lalaking nagsakay sa usa ka motorsiklo.
Sa pakighinabi sa Banat News kang SPO2 Geoffrey Gutual kini mibutyag nga base sa pamahayag sa mga residene nakit-an pa ang biktima nga nagduwa og solitaryo.
Apan sa kalit lang nga adunay mipatim-aw nga motorsiklo ug nadunggan ang angkas nga miingon “Mao ni, Mao ni” dayon pusil makaduha ka higayon apan nakadagan si Uba-ob padulong sa Plaza Independencia.
Ang mga mamumuno migukod sa biktima ug giusban kini og pusil hangtod nga nahagba diha sa atubangan sa usa ka bangko ug diha gitiwasan ug namatay.
Human sa panghitabo dali usab nga mipasirit og padagan ang mga mamumuno palayo sa maong lugar.
Matud pa ni Gutual nga base sa ilang nasayran ang biktima usa ka ex-convict ug gani napriso na kini sa National Bilibid Prison sa Muntinlupa tungod sa kasong homicide apan nakagawas human mahatagi og parole. (BANATNEWS)
- Latest
- Trending
