CEBU, Philippines - Gidunggab patay sa usa ka lalaki ang iyang kontra human siya niini gilupig sa sinukmagay sa bukirang bahin sa barangay Mainit siyudad sa Naga niadtong Huwebes sa alas 7:50 sa gabii.
Ang biktima nga natusak sa plamingko nga nitaroy sa bukobuko ug milapos sa tiyan mao si Santiago Mancara, molupyo sa nahisgutang lugar.
Samtang ang suspek mao si Norman Caro, nagpuyo gihapon sa maong dapit kinsa giingong dugay nang kaaway ni Mancara. Matud ni PO2 Miguel Castañares sa Naga City Police dihang nahinabi sa Banat News, ang biktima ug suspek nagkaaway ug nagsukmagay apan nakulatahan og maayo ang naulahi hinungdan nga kini mipauli. Apan dangtan pila ka gutlo mibalik kini ug nagdala na og plamingko ug wala makabantay ang biktima sa pag-abot niini ug nadunggaban samtang nakatalikod.
Gisuwayan pa unta og dala sa Minglanilla District Hospital ang biktima apan gideklarar kini nga dead on arrival. Samtang ang suspek nisibat human sa hitabo apan didto mitahan sa kapitan sa barangay Pangdan. – BANAT NEWS