46 barangay sa siyudad, probinsya peligroso sa landslide - MGB

CEBU, Philippines - Ang Mines and Geo-Sciences Bureau (MGB) sa Department of Environment and Natural Resources (DENR) mihatag na og "Landslide Threat Advisory" ngadto sa kagamhanan sa siyudad sa Sugbo tungod kay 19 ka mga barangay delikado sa landslide karon nga nagsugod na ang ting-ulan.

Gibase sa MGB ang maong advisory sa tinuig nga Rapid Field Assessment of Landslide/Flood Prone Barangays dinhi sa siyudad nga gisugdan sayo sa tuig 2010 ug natapos niadtong bulan sa Mayo.

Ang tigpamaba sa MGB nga si Eddie Llamido nagkanayon nga may lain pang 13 ka mga barangay sa siyudad sa Sugbo ang may dakong kahigayonan nga maapektuhan sa landslide ilabi na kun mokusog ang pagbundak sa ulan. “Of the eighty (80) barangays of Cebu City that are covered by the rapid geo-hazard assessment, nineteen (19) have high susceptibility to landslides, thirteen (13) are moderately susceptible and eight (8) have low landslide susceptibility," matud sa resulta sa inspeksiyon sa MGB. Si Llamido mitug-an nga ang naglangkob sa 19 ka mga barangay nga landslide-prone area sa siyudad nga mao ang Lusaran, Binaliw, Guba, Budlaan, Malubog, Buot-Taup, Busay , Sirao, Taptap, Tagbao, Tabunan, Pung-ol Sibugay, Sudlon II, Sinsin, Buhisan, Pamutan, Sapangdako ug Adlaon.

Matud pa ni Llamido nga ang inspection team, nga gilangkuban sa upat ka mga lisensiyadong geologist, mitumbok nga ang maong mga barangay may aktibong landslide, bakilid nga lugar, may daghang mga likiliki ug huyang ang mga kayutaan nga daling modahili kun mobunok ang kusog nga ulan ug may problema sa drainage system. Iyang gitataw nga misugyot na sila og pipila ka mga precautionary measures ngadto sa mga opisyal sa siyudad ug sa mga barangay aron makahimo na kini og lakang sa dili pa mahitabo ang pagdahili og yuta o kaha moigo ang dakong baha.

Gawas sa siyudad, gitumbok usab sa MGB nga landslide-prone area ang 12 ka mga barangay sa lungsod sa Catmon nga gilangkuban sa barangay Amancion, Anapog, Bactas, Bongyas, Cambangkaya, Cabungaan, Can-ibuang, Duyan, Ginabuacan, Panalipan, Tabili ug Tinabyonan. Laing landslide-prone area mao ang lima ka mga barangay sa dakbayan sa Toledo nga mao ang barangay Tungkay, Pangamihan, Bagacay, Loay ug Don Andres Soriano; lima usab ka barangay sa lungsod sa Asturias nga naglakip sa barangay Agbanga, Baye, Biran, Kanluangan ug Sak-sak.

Samtang naapil usab ang barangay Lamac sa lungsod sa Pinamungajan, barangay Camp 6 sa dakbayan sa Talisay, barangay Doldol ug barangay Kangacto sa lungsod sa Dumanjug ug barangay Cansalonoy sa lungsod sa Ronda.  – BANAT NEWS