14-anyos naligsan sa bus patay

CEBU, Philippines - Patay ang usa ka 14-anyos nga batan-ong lalaki human kini maligsi og bus de pasaheroan sa dihang migukod sa bola nga nalabay sa karsada sa ilang pagdula og basketball didto sa barangay Balabagon, lungsod sa Moalboal niadtong Huwebes sa alas 3:30 sa hapon.

Ang biktima mao si Johnroy Gabati Rabosa, 14, molupyo sa nahisgutang lugar. Samtang ang nakaligis niya mao ang Librando bus (GVE-20) nga gimaneho ni Jacky Villanueva, taga barangay Ylaya, lungsod sa Dumanjug.

Matud ni SPO1 Gaudencio Pariel sa Moalboal Police Station sa dihang nahinabi sa Banat News nga subay sa inisyal nga imbestigasyon, nagduwa og basketball ang biktima kauban sa laing mga batan-on sa dihang nalabay sa karsada ang bola hinungdan nga gigukod kini aron kuhaon.

Apan naatol nga maoy pag-agi sa maong bus ug na-atrasawo na pag-aplay og break ang drayber hinungdan nga naligsan gyud ang biktima nga nalatayan sa ligid sa walang bahin hinungdan nga nakaangkon og grabeng kadaot.

Ang drayber sa Librando Bus wala mohunong kay nahadlok sa mga kabanay sa biktima ug mipasirit kini lahos sa Dumanjug Police Station ug didto na siya boluntaryong mitahan sa iyang kaugalingon.

Samtang ang biktima gikarga na lang og traysikol ug gihatod sa Badian District Hospital apan gideklarar sa mga doktor nga dead on arrival.

Samtang ang drayber gi-turnover na sa Moalboal Police Station ug nagtingkagol na karon sa karsel samtang nagpaabot sa tukmang sumbong nga ipasaka batok kaniya. – BANAT NEWS