Ex-polis 'nangilkil'

CEBU, Philippines - Usa ka giingong kanhi polis nga nagpailang sakop sa Philippine Drug Enforcement Agency (PDEA) ang nasikop human pasanginling nangilkil sa usa ka langyaw niadtong Miyerkules sa hapon diha sa barangay Poblacion, dakbayan sa Talisay.

Nagtingkagol sa Talisay City detention cell si Frederick Ronduen, 40, taga 13RD Pildera 11, Pasay City apan nagpuyo na karon diha sa 510 Greenfield Village, barangay San Roque, dakbayan sa Talisay.

Ang giingong gikilkilan ni Ronduen mao si Niklaus Franzen Wildi usa ka Swiss kinsa giingong nagkadeperensiya sa pangisip ug sobra na sa usa ka buwang naglatagaw diha sa barangay Poblacion.

Si Ronduen nasikop ni PO1 Mary Jean sa Regional Personnel Human Resources Development Division (RPHRDD) uban nila ni Ruel Tabilon ug Allan Enrile mga residente sa barangay Poblacion.

Gikataho nga si Ronduen dunay gihatag nga suwat ngadto kang Wildi nga dunay pakaping withdrawal slip sa bangko nga giingong papirmahan unta sa langyaw.

Na-recover sa polis gikan sa posisyon ni Ronduen ang ID sa Armed Forces and Police Savings Loan Association Inc. (AFPSLAI), posas, dismissal order gikan sa Police Regional Office (PRO-7).

Si PO3 Eric Enad kinsa maoy imbestigador sa maong hitabo mibutyag sa Banat News nga usa ka concerned citizen ang mitaho ngadto sa PRO-7 kabahin sa maong insidente nga giingong ang nahisgutang langyaw gipangwartahan sa usa ka lalaki nga nagpailang sakop sa PDEA hinungdan nga gipanid-an dayon sa kapolisan.

Matud ni Enad nga ilang nasuta nga si Ronduen nag-AWOL (Absent Without Official Leave) kaniadto hinungdan nga nataktak gikan sa serbisyo.

Gibutyag usab ni Enad nga giingong tulo na ka higayong nakilkilan sa suspetsado ang biktima pinaagi sa pagpapirma niini og withdrawal slip sa bangko.

Sa laing bahin, kagahapon sa buntag si Wildi ang gireklamo tungod kay misulod kini og usa ka tindahan diha sa barangay Poblacion ug nanguha og mineral water nga tinda dayon gikaligo ug giinom.

Dihang gibadlong kini sa tag-iya sa tindahan wala kini mopatuo hinungdan nga ang tag-iya mitawag og polis. Sila si PO2 Leandro Azarcon kinsa uban sa mga Field Training Police (FTP) daling miresponde sa maong report ug nagtabang pag-aswat niini paggawas.

Gikatahong misukol pa kini ug diriyot maigo si Azarcon sa kinumo niini samtang nagpunay og yawyaw og “don’t touch my body you inject me cocaine.”

Base usab sa mga report dunay usa ka babaye kinsa nagpailang igsuon sa asawa ni Wildi ang magduawan sa langyaw ug mohatag og injection nga ‘maintenance’ sa sakit niini. – BANAT NEWS