Cabrido may bahad vs resort owners
CEBU, Philippines - Ang environmentalistang abogado sa Sugbo nga si Benjamin Cabrido mihatag og pahimangno ngadto sa tanang mga negosyante nga nanag-iya og mga beach resort sa lungsod sa Sta. Fe nga mas maayo mao kini ang mangunay pagguba sa ilang mga estraktura nga anaa sa daplin sa baybayon ug atubangan sa ilang gipanag-iyang beach resort.
Kini tungod kay ila gyud nga ipatuman ang kamanduan sa korte nga gub-on ang tanang mga ilegal nga estraktura sa kabaybayonan sa isla nga gikonsiderar nga public domain.
Matud pa ni Cabrido nga ang mga tag-iya og resort may igo pa’ng panahon pagguba sa mga estraktura sama sa mga kiosk sa dili pa mapupos ang 60 ka adlaw nga tagal sa korte.
Iyang gitataw nga kun dili mopatuo ang mga resort owner, silang mga environmentalista mao ang mopaguba niini subay sa kamanduan sa korte.
Iyang gitataw nga wala sila manghulga ngadto sa mga beach resort owner aron mapugos kini sa ilang tinguhang malimpyohan sa mga ilegal nga mga estraktura ang kabaybayonan sa lungsod sa Sta. Fe.
Nasayran nga niadtong nakalabay’ng bulan, ang mga environmental lawyers malampuson sa pagkuha og kamandaun sa korte alang sa mga opisyal sa Department of Environment and Natural Resources (DENR) sa pagpaguba sa mga ilegal estraktura sa mga beach resort daplin sa baybayon.
Hinuon, si Cabrido mitataw nga sa pagkakaron wala pa sila makadawat og report nga ang mga nanag-iya sa mga beach resort sa Sta. Fe mihinayhinay og guba sa ilang mga estraktura sa baybayon hinungdan nga ilang hingusgan ang maong lakang. – BANAT NEWS
- Latest
- Trending