'Tulis Me' nabisto sa kapolisan

CEBU, Philippines - Gidakop ug gipriso sa kapulisan sa lungsod sa San Fernando ang usa ka mensaherong una nang midangop sa kapolisan nga nangangkong gitulis ang iyang kwarta ug dolyar nga gipanag-iya sa iyang amo diha sa South Road Properties kon SRP.

Ang gidakop sa kapulisan niadtong Martes sa alas 8:00 sa gabii mao si Rodito Boloy, 23, lumad nga taga Davao ug kasamtangang nagpuyo sa Banawa siyudad sa Sugbo apan stay-in worker sa Uy Sartogoda Jewelry Pawnshop diha sa Manalili siyudad sa Sugbo nga gipanag-iya sa magpapa-tigayong Alex Uy.

Matud ni PO3 Glenn Burlas sa San Fernando Police dihang nahinabi sa Banat News, subay sa ilang gihimong imbestigasyon, si Boloy luwan sa motorsiklo nga gisugo sa iyang amo paghatud og P201 mil ingon man 2 mil dolyares ngadto sa ilang jewelry branch sa lungsod sa Minglanilla ug siyudad sa Naga.

Apan milahos kini sa barangay Sangat lungsod sa San Fernando ug pagkahuman misakay og jeepney ug nanaog sa lungsod ug didto nagpa-blotter sa kapulisan nga gitulis siya.

Subay sa gihimong pagsukit-sukit ni PO3 Burlas kang Boloy kini mitug-an nga samtang paingon siyang maghatod sa maong kwarta sa ilang branch nga pawnshop sakay sa motorsiklo nga iyang service kalit lang siyang gibabagan og van nga kolor puti diha sa SRP.

Ang mga sakay niini nga pulos armado mimando kaniya pagsakay sa ilang van ug gibiyaan ang iyang motor ug didto na siya gitambog sa Sangat San Fernando.

Apan sa gihimong ocular inspection sa dapit wala kini magkadimao pagkatubag hinungdan nga sa tantong sukit-sukit sa mga imbestigador miangkon kining ‘tulis me’ ang nahitabo.

Ang suspek miangkong kakunsabo niya ang igsuon sa iyang kapuyo ug didto niya gihatag ang kwarta ug gipatuo niyang gitulis siya hinungdan nga gidakop dayun sa kapolisan si Boloy.  – BANAT NEWS