BIR naningil na sa mga kandidato

CEBU, Philippines - Ang Bureau of Internal Revenue mipahimango sa tanang mga kandidatong dili nila kalimtan sa ilang pagbayad og buluhisan sa ilang nagasto sa eleksyon. Ang maong panawagan gituyo sa pagpalanog nunot sa pagpupos na sa deadline sa tanang mga kandidato sa pagduso sa ilang state of contribution and expenditures kagahapong adlawa.

Sumala pa sa tigpamaba sa BIR regional office -7 nga si Esabelo Tionco Jr. nga angayang dili usab kalimtan sa mga nakadaog ug napilding mga kandidato nga may withholding tax silang bayranan.

Ang usa ka kandidato kinahanglang mobayad og singko porsiyentong buhis diha sa BIR gikan sa kinatibuk-ang nagastos sa election campaign sa tanang kandidato.

Giklaro ni Tionco nga ang deadline sa pagbayad sa buluhisan mapupos karong bulana. Gipahibawo hinuon niini nga may mga kandidato nang nakabayad na sa ilang singko porsiyentong buhis sa BIR.

Kini mao sila si Cebu City Councilor-elect Nida Cabrera, 1st district Congressman Eduardo Gullas, 3rd district Congressman Pablo John Garcia, ug Talisay City mayor Socrates Fernandez.

Dugang pasidaan ngadto sa tanang mga kandidato ilabi na sa mga pildero nga dili makalimot sa ilang obligasyon sa BIR kay mahimo gihapon kini nilang kasuhan sa korte. - Chester Abadilla ug Rey Pasaporte (BANAT NEWS)