CEBU, Philippines - Gihagit ni Bise Gob. Gregorio Sanchez Jr. si Gob. Gwendolyn Garcia nga magdungan sila pagpang-resign sa katungdanan aron dili maapektuhan ang mga batakang serbisyo sa probinsya sa Sugbo nunot niining padayon karun nilang panag-away.
Atol sa usa ka interbyu sa estasyonan sa radyo gipadayag ni Sanchez nga andam siyang makig-sabot kang Garcia nga magdungan sila og resign aron dili ma-sakripisyo ang mga Sugboanon sa padayon nilang away ug itugyan nila ang mabiyaang posisyon sa nagsunod nilang mga opisyal sa Hunta Probinsiyal.
Sumala pa ni Sanchez nga andam gyud siya bisan unsang orasa nga mo-resign sa katungdanan pagmatuod nga wala siya mangwarta ug mabuhi sa Kapitolyo.
Gisugyot kini ni Sanchez aron mahapsay na ang dagan sa probinsya nga pagkakarun gihulagway niyang namersonalan na ang gobernador ngadto kaniya human usab niya gibulgar ang mga kwestyonableng transaksyon ug proyekto niini.
Si Sanchez maoy mibulgar karung bag-o sa gihulagway nga substandard road asphalting project sa gobernador sa kalungsoran nga gigahinan og P1.8 bilyones apan kadaghanan niini nangaguba dayun tungod kay nipis ra kaayo ang pagkatrabaho niini.
Si Gobernador Garcia atua pa karun sa gawas sa nasud alang sa opisyal nga biyahe. – BANAT NEWS