8 police chiefs gi-relibohan

CEBU, Philippines - Walo ka hepe sa kapolisan nga nadestino sa kalungsoran sa probinsya ang gipangrelibohan sugod kagahapong adlawa ug gipahigayon dayon ang turnover diha sa provincial headquarters.

Si Sr. Insp. Jaime Santillan, kanhi hepe sa San Fernando gibalhin ngadto sa Madredijos Police station, samtang si Sr. Insp. Carlos Reyes, hepe sa Carmen gibalhin usab sa San Fernando police station.

Si Sr. Insp. Milo Dagasdas kanhi hepe sa Compostela gibalhin na karun sa Carmen Police station, si Sr. Insp. Rodrigo Giangan maoy deputy sa Admin Office sa CPPO mao nay hepe sa Compostela, samtang si Sr. Insp. Francis Errol Deveyra ang hepe sa Borbon Police Station ug bag-o lang nakabangga sa Innova Patrol Car sa miaging semana lakip sa girelibohan ug gibalhin sa Admin Office diha sa provincial headquarters.

Ang Deputy sa Toledo Police station nga si Sr. Insp. Emiliano Igot maoy gitudlo nga hepe sa Borbon Police station, samtang si Insp. Jaime Tolentin nga maoy hepe sa Madredijos gibalhin ngadto sa Santa Fe Police Station diin ang hepe sa maong lungsod nga si Sr. Insp. Leoncio Baliguat anaa na karun gidestino sa PRO-7.

Si Sr. Supt. Erson Digal hepe sa kapolisan sa lalawigan nagkanayon nga mipatuman siya og re-shuffling sa mga chiefs of police tungod kay anaay naglingkod kanila nga lima ka tuig sama kang Reyes.

Apan giklaro ni Digal nga walay mayor ilabi na kadtong bag-ong napili sa usa ka lungsod nga nag-request kaniya kundili iya kining kabubut-on nga mopatuman siya og re-shuffling tungod sa rason nga dunay over staying.

Iyang gimandoan ang walo ka hepe nga iyang gipangrelibohan nga ipadayon ug hingusgan lang ang kampanya sa tanang illegal nga kalihokan sa ilang tagsa-tagsa ka hurisdiksyon sama sa drogas ug sugal.

Si Reyes sa dihang nahinabi sa mga tigbalita kagahapon nagkanayon nga wala siya magmahay nga girilibohan siya sa Carmen Police station sanglit giangkon niyang over staying na siya tungod kay miabot siya’g lima katuig nga naglingkod sa maong lungsod.

Si Reyes dili malalis nga daghan kaayong kalampusan nga nahimo sukad siya naglingkod diha sa Carmen Police station ug gani nakadawat pa kini og pasidungog diha sa PRO-7.  – BANAT NEWS