Proklamasyon!: Mar mosang-at electoral protest

Gipaabot nga iproklamar karong hapon sila si Liberal Party (LP) standard bearer Sen. Benigno Aquino III ug Puwersa ng Masang Pilipino (PMP) vice-presidential candidate Jejomar Binay aron maoy mahimong duha ka labing gamhanang tawo dinhi sa nasud.

Sa final tally sa National Board of Canvassers nakakuha si Aquino og 15,208,678 botos sobra og 5,720,841 botos batok sa kang PMP presidential bet Joseph Estrada nga 9,487,837 botos. Samtang sa vice presidential race, si Binay nga maoy runningmate ni Estrada nakakuha og 14,645,574 botos batok kang Sen. Manuel Roxas II nga 13,918,490 botos.

Ang kampo ni Roxas mipadayag nga mo-file og electoral protest gumikan sa wala pag-ihap sa dul-an 3 milyones nga null votes nga naglakip usab sa mga dapit nga iyang balwarte.

Ang proklamasyon pagka presidente ug bise presidente matud pa ni Senate Majority Leader Juan Miguel Zubiri himuon karong alas-2 sa hapon sumala pa sa report sa ABS-CBN News.

Daan nang napanglantawang dumadaog si Aquino bisan wala pa sugdi ang canvassing sa Kongreso, sa partial palang nga tally sa Commission on Elections, wala pay labot ang botos sa Lanao del Sur milabaw na og singko milyones botos si Aquino kang Estrada. Ang Lanao del Sur maoy labing uwahing naihap.