Lolo gitigbas sa liog namatay

CEBU, Philippines - Patay nang nakit-an ug dunay samad tinigbasan agi sa sundang ang liog ug nawong niini sa patay’ng lawas sa usa ka 68-anyos nga lolo daplin sa runway sa airport diha sa Northern Poblacion lungsod sa San Francisco isla sa Camotes niadtong Sabado sa alas 8:00 sa buntag.

Ang biktima nailhan sa kapulisan sa Identification Card gikan sa iyang pitaka nga si Marcelino Estrera Formentera, 68, ug molupyo sa sitio Canbadlis Northern Poblacion San Francisco.

Subay sa inisyal nga imbestigasyon sa kapulisan nga ilang gipadangat sa operations branch sa Cebu Police Provincial Office (CPPO) usa ka concerned citizen nga naagi sa maong lugar ang unang nakadiskubre sa nagbuy-od nga patay’ng lawas hinungdan nga gi-report dayon kini sa kapulisan. Sa pag-responde sa mga polis migahi na ang patay’ng lawas sa biktima ug dunay samad tinigbasan sa liog ug walang bahin sa nawong niini nga maoy gituohang hinungdan sa kamatayon niini.

Padayun pa ang imbestigasyon sa kapulisan pagtumbok sa responsable sa krimen ug ingon man sa motibo niini.

Personal nga bangi ang gitutukan sa kapulisan nga motibo sa krimen ug maoy gitutukan sa nagpadayong imbestigasyon. (BANATNEWS)