Lawas sa lalaki nasunog

CEBU, Philippines - Napaig ang usa ka lalaki human maugdaw ang gipuy-an niining panimalay pasado alas-2 kagahapon sa kaadlawon sa sitio Roosevelt sa barangay Busay ning dakbayan.

Ang namatay nailhan nga si Jason Enriquez, 28, molupyo sa maong lugar kansang patay’ng lawas napaig og maayo dihang nakit-an sa mga residente.

Sa pakighinabi sa Banat News kang SFO1 Nick Ouano sa Cebu City Bureau of Fire Protection mibutyag kining nadawat sa ilang buhatan ang maong alarma alas 2:09. Naisa lamang kini sa 1st alarm gumikan kay walay mga kasikbit nga balay si Enriquez apan gibana-banang nagkantidad og di mominos P20 mil ang danyos sa maong sunog.

Base sa nakalap nga impormasyon sa ilang imbestigador, ang biktima sa sayo pa gikan nag-inom sa usa ka tindahan sa ilang dapit ug dihang mipauli sa ilang panimalay gipakusgan niini og maayo ang iyang radyo.

Pipila ka minutos ang milabay mao nalay nadunggan sa mga silingan ang kusog usab kaayong buto nga naggikan sa panimalay sa biktima ug sa ilang pagsusi nagdilaab na ang panimalay ni Enriquez.

Diha-diha gisuwayan pagbubo og tubig sa mga silingan ang panimalay sa biktima apan wala na gyud kini matabang pa tungod sa kadako sa kalayo.

Ang balay ginama sa gaay maong dali kaayo ang pagkuyanap sa kalayo.

Nasayran usab nga niadtong tungura ang ginikanan sa biktima wala sa ilang panimalay kini tungod kay anaa kini sa ilang flower shop sa syudad sa Mandaue.

Gidudahang faulty electrical wirings ang hinungdan sa maong sunog ug gani bisan ang mga silingan nagtuo gyud nga ang hinungdan sa maong sunog mao ang hilabihang pagkakusog nga pagpatukar sa biktima sa ilang sounds. (BANATNEWS)