Gitiona'g armas sa silingan misumbong sa kapolisan

CEBU, Philippines - Usa ka babaye misumbong sa kapolisan sa dakbayan sa Talisay kay gitionan siya og armas de fuego sa iyang silingan sa sitio Roma, barangay Dumlog, sa maong dakbayan sa miaging hapon.

Ang biktima mao si Benita Maloloy-on, 38, nga taga Roma, samtang ang suspetsado mao usab ang iyang silingan nga si Manuel Aguanta, hingkod ang panuigon.

Si PO3 Edwin Alvarado sa Talisay City Police Station mibutyag sa Banat News nga daan nang nagkabangi ang biktima ug ang suspetsado sa butang nga wala ibutyag sa biktima.

Ang biktima nga si Maloloy-on nawad-an og kaluoy sa iyang silingan hinungdan nga gisumbong niya kini sa kapolisan tungod kay nabalaka siyang patyon niini.

Ang suspetsado usab nga si Aguanta matud pa sa kapolisan nga malagmit wala na makaagwanta sa iyang kasilag ug kalagot sa biktima hinungdan nga dihang iya kining nakita gitionan dayon niya sa iyang armas de fuego.

Gawas sa pagtion gimandoan pa ni Aguanta nga palayason ang biktima gikan sa maong lugar tungod malagmit dili siya kaagwanta nga magsud-ong sa biktima nga magpabilin pang makita sa iyang mga mata sa ilang lugar.

Hinuon gamay ra kaayo ang maong kaso busa gitunol kini sa kapolisan ngadto sa barangay aron ang lupon na sa barangay maoy mohusay niini. – BANAT NEWS