Gitusak og bala namatay

CEBU, Philippines - Patay ang usa ka tawo human tusaka ang kalawasan og bala saw ala mailhing batan-on sa miaging gabii diha sa sitio Mahayahay, barangay Bankal, dakbayan sa Lapulapu.

Ang biktima mao si Boyet Silawan, 21, nagpuyo sa Sac 1, sa barangay Buaya sa maong dakbayan ug ang mipusil igo rang gihulagway nga batan-on ug kasarangan ang panglawas.

Sa imbestigasyon ni SPO3 Rex Ybañez sa Crime Against Person Desk sa kapolisan sa maong dakbayan maoy nasayran nga nagsakay og traysikad ang biktima kuyog sa usa ka Lorenzo Ymbong.

Matud pa ni Ybañez nga ang duha gikan sa sitio Sac 1 sa barangay Buaya sa maong dakbayan apan sa ilang paglabay sa eskina sa Kauswagan ug Mahayahay sa barangay Bankal kalit nga may migukod kanila ug namusil.

Ang migukod sa biktima midagan dayon padulong sa barangay Pusok samtang ang biktima nakabaton og tulo ka samad pinusilan sa iyang bukobuko ug daling gidala sa Mactan Doctor Hospital apan gideklarar nga patay na.

Wala pay matumbok nga motibo o responsable ang kapolisan kabahin sa maong krimen. – BANAT NEWS