CEBU, Philippines - Patay nang naabot sa tambalanan ang usa ka lalaking gikatahong ‘kawatan’ human kini gipusil sa usa ka lalaking nagmotor sa miaging gabii sa sitio Ward II barangay Poblacion lungsod sa Minglanilla.
Ang namatay nailhan nga si Jerome Pansacala Pesalbon, 25, taga Tagaytay Vito sa nahisgutang lungsod samtang ang mipusil kaniya gihulagway lang nga nagsul-ob og itom nga t-shirt, nag short pants ug nagkalo.
Sa pakighinabi sa Banat News kang PO1 Edwin Camota ang gikatahapan nagsakay og kolor blue nga motorsiklo ug mihunong sa tungod sa gilingkoran sa biktima atubangan mismo sa Minglanilla Fire Station.
Ang maong lalaki kalit lang nga mipusil sa biktima sa walay igong hinungdan ug daling miikyas palayo padulong sa dakbayan sa Sugbu.
Ang biktima daling gidala sa Minglanilla District Hospital tungod sa naangkong samad pinusilan sa walang bahin sa iyang dunggan apan pipila ka minutos ang milabay nakabsan kini sa kinabuhi.
Matud pa ni Camota nga base sa mga nadawat nilang impormasyong si Pesalbon maoy gitumbok nga mangawat diha sa maong lugar ug makadaghan na kining gireklamong nanglungkab.
Ukayon pa usab sa kapolisan kun aduna bay naka-blotter nga insidenteng nalambigit ang biktima sa tinguhang makakuha og lead sa pagpatay niini. – BANAT NEWS