Mayor Soc hayan apilon sa kiha

CEBU, Philippines - Nangandam na ang kapolisan sa pagpasaka og kasong ‘obstruction of justice’ batok kang Talisay City Mayor Socrates Fernandez ingon man laing kaso usab batok sa iyang sinagop nga si Joavan Fernandez gumikan sa pagpanghulga dihang kini gipasanginlang nanion og armas sa usa ka registered nurse niadtong Biyernes.

Ang hepe sa Talisay City Police Station nga si Supt. Elmer Lim mitug-an sa mga tigbalita nga gihikay na sa Cebu Provincial Police Office Investigation and Detective Management Branch ang pagpasaka og kaso batok sa mayor.

Si Joavan naaresto sa kapolisan human ireklamo og pagpanion og armas sa usa ka registered nurse nga si Vincent Castrodes diha sa barangay Bulacao Talisay niadtong Biyernes sa hapon human diriyot silang magkabinanggaay.

Kasamtangang gitigom sa kapolisan ang mga pinanumpaang affidavit nila ni SPO1 Ceriaco Luab ug PO2 Epifanio Comendido nga maoy gipabantay sa Isuzu Big Horn ni Joavan diha sa usa ka shop human madakpi si Joavan.

Si Luab ug Epifanio walay nahimo dihang kalit nga miabot ang mayor kuyog ang usa ka batan-ong babaye ug lalaki ug miinsister og abli sa maong sakyanan. Ang mayor gikatahong miinsister nga iyaha ang maong sakyanan ug dayong kuha sa usa ka bag diha sa sulod ug mibiya.

Si Comendido dihang gikahinabi sa Banat News mibutyag nga lima palang ka minutos gikan sa ilang pag-abot ug gimandoang i-kordon ang sakyanan miabot usab ang mayor.

Sumala pa niini nga ilaha gyung gihangyo ang mayor nga dili ablihan ang sakyanan nga ilahang gibantayan tungod kay gipaubos pa kini sa imbestigasyon gumikan sa reklamo batok sa sinagop niini.

Apan giingong mitaas ang tingog ni Fernandez ug gikwestyon   si Comendido kun unsay problema nga iyaha man kining sakyanan. Human makuha ang bag walay tingog nga mibiya ang mayor.

Si Fernandez dihang gitawgan sa Banat News aron pangayoan og pamahayag kabahin sa pasangil sa mga polis mibalibad paghatag og komento gumikan sa tambag kaniya sa iyang abogado.

Gumikan niini mohimo og imbestigasyon ang Department of Interior and Local Government kon (DILG) may labot sa alegasyong gihulagway sa kapolisan nga pag-interbiner sa mayor.

Gibutyag ni DILG-7 director Pedro Noval nga paabuton nila ang resulta sa gihimong imbestigasyon sa kapulisan sa maong kaso una pa mohimo og lakang batok kang Fernandez.

Sumala pa ni Noval nga kun mapamatud-an sa maong imbestigasyon nga nakabalda si Fernandez sa pagkab-ot sa hustisya mahimo kining mapasakaan og kaso.

Nagtuo ang kapolisan nga diha sa maong bag gisulod ang armas nga giingong gipangtion niini ngadto kang Castrodes.

Ang pamilyang Castrodes determinado gyud nga mopasaka og kaso batok sa sinagop sa mayor ugmang adlawa diha sa Talisay City Prosecutors Office.   (BANATNEWS)