Pamilya sa Kapitan gi-ambush

CEBU, Philippines - Patay ang bana sa kapitana sa barangay Kantaw-an dakbayan sa Naga human kini gi-ambush sa tulo ka mga lalaking nagmotorsiklo diha duol sa panimalay niini sa maong barangay sa milabay’ng Biyernes sa gabii.

Ang homicide investigator sa kapolisan sa dakbayan sa Naga nga si PO2 Ken Cabrera miila sa namatay nga si Florante Gudoy, 40, bana ni Kantaw-an barangay kapitan Fe Gudoy.

Matud pa ni Cabrera nga ang biktima maoy nagmaneho sa sakyanan uban ang iyang asawang kapitan ingon man ang usa sa ilang anak ug usa ka barangay tanod gikan mitambong sa victory party ni Naga City Mayor Valdemar Chiong sa Poblacion.

Sumala pa ni Cabrera namahayag ang mga kaubanan ni Gudoy nga samtang sila nagpadulong pauli nakamatikod silang may nagsunod-sunod kanilang tulo ka mga lalaking sakay sa usa ka motorsiklo gikan pa sa barangay Poblacion hangtud na sa barangay Kantaw-an.

Apan dihang hapit na silang moabot sa ilang balay kalit nga mipasutoy ang maong mga lalaki ug misikit sa ilang sakyanan ug usa kanila mibunot og wala matinong kalibre sa armas dayong pusil ngadto kang Florante Gudoy.

Si Florante Gudoy naigo sa walang bukton ug milapus ngadto sa walang bahin sa dughang hinungdan sa pagkalup-og niini samtang ang tulo ka mga lalaki mipasutoy sa motorsiklo palayo.

Daling gidala si Gudoy ngadto sa South General Hospital sa Tuyan, apan pipila ka oras sa pag-atiman sa mga doktor ang biktima namatay kini.

Ang kapolisan sa siyudad sa Naga mipalawom pa sa ilang imbestigasyon kun unsa ang motibo sa pagpatay sa biktima nga naglakip sa politika, personal ug ang giingong reklamo human niadtong eleksyon nga gipasanginlan ang biktima nga nanion og armas.

Ang asawa niining kapitan mitug-an sa kapolisan nga wala gyud kini nahinumdumang dunay nakaaway ang biktima, bisan na sa politika wala silay nadawat nga mga hulga sa kinabuhi sa wala pa mahitabo sa krimen.   (BANATNEWS)