Upat ka pusher og shabu nasikop

CEBU, Philippines - Upat ka pusher og shabu nga naglakip sa usa ka babaye ang nadakpan sa buy bust operation nga gipahigayon sa mga polis sa dakbayan sa Mandaue ug dakbayan sa Lapulapu niadtong miaging gabii.

Ang nagkagulkol na karon sa prisohan sa kapolisan sa dakbayan sa Lapulapu mao sila si Ernesto Pangatungan, 38 , ug Alex Dejetoi, 37, nga pulos taga sitio Pag-utlan, barangay Maribago, dakbayan sa Lapulapu.

Ang duha nadakpan nila ni SPO1 Esabelo Ybanez ug nasakmit nila ang duha ka paketengng   shabu ug mga kahimanan sa paggamit niini gikan sa mga dinakpan.

Samtang ang nagtingkagol usab sa prisohan sa kapolisan sa dakbayan sa Mandaue mao sila si Nerissa Quindao, 43, nga taga sitio Tamatis sa barangay Paknaan ug Walter Otasa, 36 nga usa ka bayot ug molupyo sa barangay Opao, dakbayan sa Mandaue.

Ang team sa kapolisan sa Presinto 5 sa Opao Police Station nga gipangulohan ni Inspector Wilfredo Abot maoy nakasikop kanila ni Quindao ug Otasa.

Matud pa ni PO2 Eleazar Llanes nga lakip unta sa ilang nadakpan si Teresita Alinsug apan nakaipsot kini kay milimod sa tinuod niyang ngalan dihang gisukit siya sa kapolisan kinsa nagpangita sa babayeng si Teresita Alinsug.

Ang kustomer nga si Otasa, maoy naabtan sa mga polis nga naghingus og shabu busa giposasan dayon kini.

Gipasabot ni PO2 Llanes nga wala sila makasinati sa tinuod nga panagway ni Alinsug ug ilang gitugotan nga makalakaw dihang nagpasumangil kini nga adtoon ang ilang gipangita nga si Alinsug.

Si Quindao sa ilang imbestigasyon mialigar nga usa siya ka Muslim nga taga Mantuyong nga maoy tighagbong og shabu sa ilang dapit ug si Alinsug maoy kontak sa maong supplier. (BANATNEWS)