Gibasol sa kamatayon sa asawa napusilan
CEBU, Philippines - Talandugon ang kahimtang sa usa ka 29-anyos nga biyudo human mabulit og samad pinusilan ang kalawasan dihang gipusil makadaghang higayon atol sa disko diha sa sitio Dita barangay Jagbuaya lungsod sa Tuburan niadtong Biyernes sa alas 11:50 sa gabii.
Ang biktima mao si Henane Lomangyao Duenas, 29, molupyo sa maong lugar, samtang ang mamumuno pabilin pang wala mailhi sa kapulisan sa paghimo ning balita.
Matud pa ni PO1 Christopher Brigoli sa Tuburan Police dihang nahinabi sa Banat News, nakig-inom si Duenas sa iyang mga barkada sa gawas nga bahin sa diskohan.
Kalit lang miabot ang wala mailhing lalaking nagbitbit nang daan og wala matinong kalibre sa armas dayong singgit sa mga tawo sa paghapa ug diha-diha gipusil niini si Duenas makadaghan ug daling midagan palayo.
Sa pagresponde sa mga polis naabtan pa nila ang biktima nga nagbuy-od sa yuta nga naglunang sa kaugalingong dugo ug gihatod dayun sa Tuburan District Hospital apan tungod sa kagrabe sa mga samad pinusilan niini gibalhin kini dayun sa tambalanan sa dakbayan sa Sugbo.
Dili muminos pito ka samad pinusilan ang naangkon sa biktima sa hawak, walang abaga, tiyan, walang bahin sa dughan, walang kamot, ubos nga bahin sa apapangig nga nilapos sa iyang walang mata.
Ang kapulisan naka-rekober og upat ka kabhang sa bala sa kalibre .45 nga maoy gituohang gigamit sa mamumuno.
Apil sa gikonsiderar sa anggulong gisubay sa nagpadayong imbestigasyon sa kapulisan nga motibo mao ang nahitabong pagkamatay sa asawa niini niadtong milabay’ng tuig nga natagak sa motorsiklong iyang gimaneho nga gikatahong wala madawat sa mga kabanay sa babaye. (BANATNEWS)
- Latest
- Trending















