Managpuyo nga 'pusher' nadakpan

CEBU, Philippines - Nasikop sa operatiba sa Regional Special Operation Group ang managkapuyo nga gipasanginlang drug pushers sa dalan Abarquez sa barangay Calajoan sa lungsod sa Minglanilla kagahapon.

Ang gidakop giilang sila si Erenie Eugenia, 31 ug Rimond Jayme Tabligan, 22, human ang kapolisan makakuha og 14 ka paketeng may sulod nga gidudahang shabu diha sa ilang panimalay.

Si PO1 Ariel Llanes sa RSOG-7 dihang gikahinabi sa Banat News nagkanayon nga nakadawat sila og impormasyong namaligya og ginadiling drugas ang duha sa maong dapit.

Hinungdan nga ilaha kining gipanid-an ug gipalitan sa ilang ‘police asset’ og usa ka paketeng shabu niadtong Hunyo 1, dihang nakumpirmar sa PNP Crime Laboratory nga shabu gyud ang gibaligya sa duha mikuha sila og search warrant gikan sa Regional Trial Court (RTC) Branch 17 ni Judge Silvestre Maamo Jr. aron maronda ang panimalay.

Atol sa pagsiksik sa panimalay nakuha sa kapolisan ang 14 ka paketeng pulos may sulod nga gidudahang shabu ug drug paraphernalia. Gikatahong P250 ang matag pakete sa maong shabu.

Ang duha dihang gikuhaan og pamahayag sa Banat News mihimakak nga sa ilang balay nakuha ang mga ebidensya ug wala sila masayod kun diin kini makaplagi sa mga polis.

Samtang si PO1 Llanes mibutyag nga base sa ilang impormante dugay nang namaligya og shabu ang duha sa maong lugar ug gihimo nang ‘suyupanan’ ang ilang balay sa ilahang mga customer.

Gikatakdang ipaubos sa drug test ang duha subay usab sa probisyon sa RA 9165 nga tanang suspek nga malambigit sa ilegal nga drugas ipailawom dayon sa drug test.   (BANATNEWS)