Mga polis sa Mandaue nakadawat og comendation

CEBU, Philippines - Nakadawat og Certificate of Commendation (CoC) ang napulo ka mga polis sa Cebu City Police Office (CCPO) ug tulo ka mga auxillary force sa ilang kalampusan sa pagsikop sa usa ka most wanted person nga si Christopher Abay-Abay alyas Aldo nga nag-atubang og kasong highway robbery ug murder.

Si Sr. Supt. Patrocinio Comendador Jr., director sa CCPO maoy mitunol sa CoC human sa ilang flag raising ceremony niadtong miaging Lunes.

Ang nakadawat sa maong CoC mao sila si Police Chief Inspector Michael Anthony Bastes, SPO4 William Alicaba, SPO4 Mario Revilla, SPO1 Raul Cosedo Jr., PO3 Tremane Sotto, PO3 Rey Dosdos Jr., PO2 -Yvien Trangia, P02 Pompie Tanajura, PO2 Christopher Torregosa ug PO1 Ralph Vincent Manondo.

Samtang ang mga sakop sa Theft and Robbery Auxillary Force (Tracker) nga nakadawat usab og CoC mao sila si Romel Yburan, Ma. Theresa Yburan ug Elizalde Recla.

Si Abay-Abay kinsa dugay na nga gipangita sa kapolisan maoy suspetsado sa pagpatay kang Danilo Cabaluna nga usa ka barangay tanod sa Basak Pardo sa dakbayan sa Sugbo ug mao usab ang suspetsado sa pagpusil patay sa usa ka German national niadtong Abril 27 niining tuiga didto sa White Road, Inayawan sa dakbayan sa Sugbo.

Kasamtangan karong gibalhog si Abay-Abay sa Cebu City Jail sa barangay Kalunasan sa dakbayan sa Sugbo ug ang korte walay girekomendar nga piyansa alang sa temporaryo niining kagawasan. – BANAT NEWS