Cortes miandam sa mga proyekto

CEBU, Philippines - Giandam na ni Mayor Jonas Cortes sa dakbayan sa Mandaue ang tanan aron ang mga programang wala ikapatuman sa una niyang termino, ikapatuman na niining higayona nga maoy ikaduha niyang termino   sa pagdumala isip mayor sa maong dakbayan.

Nag-una sa iyang mga programa nga ipatuman ning higayona mao ang paghatag og permamente ug desenting panimalay sa mga kabus nga molupyo sa maong dakbayan.

Gani tiwasunon nalang kini kay nagbuntaog naman ang unang 14 ka matahom kaayong balay alang sa 14 usab ka benepisyaryo sa barangay Lower Tipolo sa maong siyudad.

Si Mayor Cortes mibutyag sa  Banat News nga siguroon niya paghatag og desenting puloy-anan mao kadtong mga uyamot kaayong mga molupyo nga naa sa delikadong mga lugar sama sa nagpuyo sa tampi sa sapa nga dali kaayong ibanlas sa panahon nga may baha nga mahitabo.

Apan kinahanglang anaa sila sa listahan sa mga benepisyaryo sa 9.2 ka ektaryang lote nga nahisakop sa barangay Tipolo, barangay Guizo, Mantuyong, Subangdaku ug uban pang lugar sa dakbayan sa Mandaue.

Matud pa ni Cortes nga ang 6.5 ka ektaryang luna sa barangay Paknaan sa maong dakbayan mao unta ang himoong relocation site sa mga kabus sa dakbayan kansang mga balay anaa sa mga peligrong dapit, apan wala kini aprobahi sa mayoriyang sakop sa konseho sa maong dakbayan. – BANAT NEWS