City Hall mosukol og kombati sa Kapitolyo

CEBU, Philippines - Ang kagamhanan sa dakbayan sa Sugbo mibasura sa demanda sa Kapitolyo nga ibalik sa CITOM ang giguyod niining trailer flat bed nga iya sa kagamhanan sa lalawigan.

 Sumala pa ni manlalaban Joseph Bernaldez , ang legal officer sa City hall nga dili sila moduko sa gusto sa taga Kapitolyo.

Gitumbok ni Bernaldez nga ilang naklaro nga may kalapasan gyud sa traffic rules sa siyudad ang pagpundo sa maong trailer flat bed sa dalan Don Mariano Cui, sanglit gibabag kini sa karsada.

 Gawas sa traffic   violation, wala usab sila makombinse sa giduso nga dokumento sa buhatan ni Gobernador Gwen Garcia nga nagmatuod nga ang Kapitolyo maoy nanag-iya sa maong trailer.

Matud pa ni Bernaldez   nga ang iyang buhatan andam nga motabang kang CITOM Executive officer Arnel Tancinco kinsa gihulga sa Kapitolyo pinaagi ni manlalaban Rory Jon Sepulveda nga pasakaan og mga kaso tungod sa maong hitabo. Gipanghimakak usab niya nga gipaluyohan kini sa politikanhong panimalos gumikan kay sa milabay’ng buwan gidakop man usab sa kapolisan sa lungsod sa Barili ang mga Kaoshiung bus nga walay mga papeles. – BANAT NEWS