La Niña gipangandaman

CEBU, Philippines - Ang kapolisan dinhi sa tunga-tungang Kabisay-an nangandam na nunot sa gipaabot nga La Niña Phenomenon nga posibleng motumaw karung buwana o sa sunod buwan sa Hulyo.

Si PRO-7 Chief Supt. Lani-O Nerez kinsa mao usab ang chairman sa Regional Disaster Coordinating Council (RDCC)-7 nagkanayon ang Pag-Asa ug Department of Environment and Natural Resources (DENR) miila na sa mga lugar nga delikado kaayo kun panahon sa ting-uwan ilabi na kung motaas ang tubig.

Pipila niini duol sa mga sapa ug bukid nga peligrosong modahili o lunopan sa tubig kun mobunok og maayo ang uwan.

“Kinahanglan magbantay gyud ang katawhan ilabi na diri Cebu sa pagtumaw unya sa ting-uwan,” pasidaan pang Nerez.

Gani karung sunod semana mopatawag siya og command conference sa tanang miyembro sa RDCC ug DENR kun unsay ilang planong himuon nga lakang alang na sa ilang pagpangandam ug unsa usab ang angayan nga buhaton sa umaabot ting-uwan aron kalikayan ang kalamidad.

Ang Pagasa mipahibawong duna nay nasigpatan nga low pressure area apan wala pa kini matino kung mamugna bang bagyo sa umaabot nga mga adlaw.

Gipahimangnoan ni Nerez ang katawhan dinhi sa Sugbu nga dili mokompiyansa sa higayong motumaw na ang ting-uwan ug kinahanglang mangandam gyud.

Matud ni Nerez nga expected na gyud nga human sa El Niño mobanos gilayon ang La Niña busa ang katawhan magmabinantayon.

Hinuon gibutyag ni Nerez nga ang PRO-7 aduna hinuoy magamit kun moigo ang kalamidad ilabi na dinhi sa Sugbu nga ila unang magamit sa pag-rescue, sama sa oxygen, rubber boat ug uban pa. – BANAT NEWS