Minor nga 'rugby boy' gipatay

CEBU, Philippines - Patay ang usa ka minor de edad sa dihang gipusil sa duha ka mga batan-ong nagluwan og motorsiklo diha sa Osmeña St. sa barangay Poblacion sa dakbayan sa Lapulapu kagahapon sa kaadlawon.

Ang biktima mao si Gerson Tibayan, minor de edad ug residente sa sitio Tugas sa Gun-ob dakbayan sa Lapulapu.

Sa pasiunang imbestigasyon ni PO1 Maximo Villagonzalo sa Crime Against Persons Desk sa kapolisan sa Lapulapu nasutang uban sa mga higala si Tibayan mga alas 2:15 kagahapon sa kaadlawon nagbarogbarog sa maong dapit dihang kalit giduol sa duha ka mga batan-on dayong pamusil ngadto sa biktima.

Si Tibayan naigo sa tiyan, nawong ug sa bukton gamit ang kalibre .45 maoy hinungdan nga kini nakabsan sa iyang kinabuhi.

Samtang ang duha ka mga namusil wala mailhi sa mga kauban sa biktima ug ang motorsiklo nga gisakyan walay plate number nga daling mipahilayo sa maong dapit.

Si SPO2 Danilo Aying sa Crime Against Persons desk (TRS) mipadayag nga ang biktima kanunay nilang masikop sa Station 3 kaniadto gumikan sa kalambigitan sa paghingos og rugby ug pipila ka kaso sa pangawat sa mga paninda sulod sa merkado publiko sa dakbayan sa Lapulapu.

Gumikan kay usa pa kini ka minor kanunay kining makagawas human nila itugyan sa Women’s and Children’s Desk sa kapolisan ug mobalik kini sa ilang naandang bisyo. – BANAT NEWS