Joavan nadakpan!

MANILA, Philippines - Bag-uhay palang nakig-uliay sa maayong kabubut-on ang kontrobersyal nga sinagop ni Talisay City Mayor Socrates Fernandez nga si Joavan ug sa gwardiyang mireklamong gitionan og armas niadtong milabay’ng semana, nadakpan kagahapon si Joavan sa lain na usab nga reklamong pagpanion og armas.

Sa insidente kagahapon sa hapon nahitabo atubangan sa Vista Grande Subdivision, barangay Bulacao, dakbayan sa Talisay diin usa ka registered nurse nga si Vincent Joe Revilla Castrodes, 28, taga dalan 6B-F. Llamas barangay Labangon, dakbayan sa Sugbo ang mireklamong gitionan ni Joavan.

Si SPO1 Oliver Dacua sa Talisay City Police Station sa pakighinabi niini sa Banat News mitug-an nga si Castrodes nagmaneho sa sakyanang BMW nga nagtangag sa plakang LEU- 777 gikan sa ilang balay paingon ngadto sa habagatang bahin.

Pag-abot sa atubangan sa Vista Grande kalit nga migawas ang sakyanan ni Joavan nga usa ka Isuzu Trooper nga may plakang YEZ-460 hinungdan nga gibusinahan kini ni Castrodes.

Apan giingong nasuko si Joavan ug gitionan niini og pusil si Castrodes dayong pasutoy sa iyang sakyanan, si Castrodes sa iyang kahadlok midiretso ngadto sa Talisay City Police Station ug nangayo og panabang sa mga polis.

Ang grupo sa alert team nga sila si SPO1 Ceriaco Luab, SPO1 Ricardo Balbutin ug PO1 Rusty Pelayo daling nangita sa Isuzu trooper nga gireklamo ni Castrodes hangtud nga kini nakit-an sa usa ka shop sa sitio Sombrea, barangay Mohon. Tungod sa reklamo gidala sa mga polis si Joavan diha sa Police Station sa barangay Poblacion.

Si Senior Inspector Isagani Abalo deputy sa TCPS sa pakighinabi niini sa Banat News nagkanayon nga desidido gyung mopasaka og kaso ang biktima batok sa sinagop sa mayor.

Si Sr. Supt. Erson Digal ang director sa Cebu Provincial Police Office human sa reklamo batok kang Joavan niadtong milabay’ng semana mipasidaan sa mga sakop nga bantayan ug dakpon dayon si Joavan kun malambigit na usab sa kasamok.

Ang mayor dihang gitawgan sa Banat News aron makuhaan og pamahayag nangayo kini og pasaylo nga dili makahatag og pamahayag tungod kay wala pa siya makapananghid sa ilang abogado.

Atol ning pagsulat sa balita, padayon pang nagmagahi paghatag sa yawe sa iyang sakyanan nga tuyo untang tan-awon sa kapolisan kun duna ba gyud kini gidalang armas subay sa reklamo ni Castrodes.

Ang kapolisan nagtinguhang makakuha kagabii og search warrant aron mabuksan ang sakyanan ni Joavan apan naatol nga brownout sa halos kinatibuk-an sa downtown Talisay gumikan sa aksidente sa Rabaya St.(basaha sa Poste gilarot sa trak). Kahinumduman nga niadtong miaging semana lang si Joavan gipasanginlang nanion sa usa ka gwardiya diha sa Vista Grande nga si Cleto Dandan apan nagpinirmahay nga mag-uliay og buot. – BANAT NEWS