Negosyanteng babaye gitulis ug gidunggab

CEBU, Philippines - Kritikal ang kahimtang sa usa ka negosyanteng babaye human kini gitulis ug gidunggab didto sa dalan Ompad, dakbayan sa Lapulapu kagahapon sa buntag.

Ang biktima mao si Rosemarie Gorgonia, 39, dalaga, lumad sa Talamban, dakbayan sa Sugbo ug kasamtangang nagpuyo sa Poblacion, Lapulapu diin adunay dakong tindahan sulod sa merkado publiko sa dakbayan sa Lapulapu.

Sa pasiunang imbestigasyon ni SPO3 Rex Ibañez sa Crime Against Persons Desk nasayran nga mga alas 4:30 kagahapon sa kaadlawon migawas sa iyang gipuy-an ug mitabok kini sa gipuy-ang boarding house sa iyang igsuon atbang sa iyang gipuy-an diin kalit kini nga gisugat sa usa ka tawo nga nagmaskara ug mideklarar nga tulis.

Si Gorgonia nga misukol ug nagdumili paghatag sa iyang bag gidunggab sa tulisan duha ka higayon sa iyang dughan ug usa sa iyang kamot.

Bisan pakyas ang tulisan pagkuha sa bag ni Gorgonia, apan grabe ang mga samad nga nahiaguman niini nga daling gidala sa Mactan Doctor’s Hospital ug ubos pa karon sa obserbasyon.

Sa pagresponde sa kapolisan, nakuha sa nahitaboan ang usa ka kutsilyo nga adunay gitas-ong 13 pulgadas nga gilabay sa suspetsado sa dihang mipahilayo kini sa maong dapit.

Si Lapulapu City Police Office Director Sr. Supt. Mariano Natu-el Jr. naalarma na niini ug mimando sa iyang mga sakop sa pagsulbad sa maong kaso ug sa pag-ila sa responsable sa maong mga krimen sa daling panahon.  - BANAT NEWS