Balay sa tanod chief sa Bagalnga girakrakan

CEBU, Philippines - Girakrakan ang pinuy-anan sa hepe sa tanod nga gidudahang nanunog og mga balota sa milabay’ng eleksyon samtang nahinanok kini sa pagkatulog kauban ang iyang asawa didto sa barangay Bagalnga, lungsod sa Compostela niadtong Miyerkules sa alas 2:30 sa kaadlawon.

Ang magtiayong biktima mao si Edgar Pasaol ug asawa niini nga si Mercedita Pasaol, mga molupyo sa nahisgutang lugar. Samtang duha ka mga lalaki nga nagmotorsiklo ang gitumbok nga responsable sa krimen.

Matud ni PO2 Fedelito Jopia sa Compostela Police Station sa dihang nahinabi sa Banat News subay sa inisyal nga imbestigasiyon ang magtiayon nangatulog kini niadtong higayona sa dihang kalit lang sila gipukaw sa tulo ka sunod sunod nga buto sa armas.

Namatikdan na lang sa mga biktima nga namanhod ang ilang tuong batiis ug didto nila mahibaw-i nga nakaangkon sila og samad pinusilan sa pulos   tuong bahin sa batiis ug daling gihatod sa Danao District Hospital sa siyudad sa Danao ug luwas na sa peligro.

Samtang ang miresponde nga mga polis naka-recover og duha ka kabhang sa bala sa kalibre .45 sa crime scene.

Subay sa gihimong imbestigasyon sa kapolisan sa wala pa ang hitabo nakamatikod ang magtiayon nga biktima sa usa ka motorsiklo nga miagi sa ilang lugar ug dangtan og pipila ka minutos ang milabay milanog dayon ang buto buto sa armas.

Padayon pang gi-imbestigar sa kapolisan ang maong panghitabo ug apil sa gikonsiderar ang posibleng kalambigitan sa politika ang motibo gumikan sa nadawat nga report sa kapolisan nga ang hepe sa tanod gitumbok kini nga maoy usa sa misunog sa mga balota niadtong milabay’ng eleksyon sa Mayo 10 sa maong lungsod.

Gisusi pa usab karon sa kapolisan kun si kinsa nga supporter ang maong tanod aron magsilbeng giya pagtugkad sa motibo sa krimen. – BANAT NEWS