Police chief nadisgrasya

CEBU, Philippines - Naangol ug nalandig sa tambalanan ang hepe sa Borbon Police Station human ang gimaneho niining Innova Patrol car mibangga sa punoan sa kahoy nga mahogany dihang mibuto ang ligid niini diha sa sitio Libas sa barangay Campusong niadtong miaging gabii.

Giingong nagpatrolya si Sr. Insp. Francis Errol Deveyra uban sa iyang mga sakop nga sila si PO3 Fernando Velarde, PO3 Elpidio Mahumot ug PO2 Rey Suson sa maong dapit dihang nahitabo ang aksidente sumala pa sa report nga gipadangat diha sa operations branch.

Apan pag-abot nila sa naasoy’ng lugar ang walang bahin sa unahang ligid sa wala kalit nga mibuto ug nawad-an og kontrol si Deveyra ug didto mibangga sa punoan sa mahogany.

Si Deveyra nakaangkon og bun-og ug samad sa kalawasan ug gidala sa Chong Hua Hospital sa dakbayan sa Sugbu.

Si Sr. Supt. Erson Digal, hepe sa kapolisan sa lalawigan mitug-an sa mga tigbalita nga gipailawom sa brain scan ug X-Ray ang walang paa niini.

Apan giklaro ni Digal nga dunay standing policy ang Philippine National Police (PNP) nga kinahanglan duna gyuy driver nga gi-assign sa patrol car ug dili mahimong lain ang magmaneho niini.

Gikatahong gidala ni Deveyra ang sakyanan sa giabangang balay apan nadisgrasya kini pagpadulong didto, gumikan niini dunay imbestigasyong himuon batok sa maong naangol nga hepe. – BANAT NEWS