Ginang gipatay sulod sa iyang karenderya

CEBU, Philippines - Patay diha-diha ang usa ka ginang human gipusil sa usa sa duha ka armadong tawo sulod sa iyang karenderya kagahapon sa buntag sa Purok 5 sa barangay Talavera sa dakbayan sa Toledo.

Ang gipusil ug namatay mao si Estrella Tapao Edoloverio, 55, minyo ug nagpuyo sa maong lugar, duha ka tawong nagsakay og motorsiklo ang gitumbok nga mipusil sa biktima.

Si Edoloverio nakaangkon og duha ka samad pinusilan sa iyang liog ug usa diha sa luyong bahin sa iyang lawas nga maoy nakaingon sa iyang hinanaling kamatayon.

Subay sa pasiunang imbestigasyon sa kapolisan sa crime scene nga sila si PO3 Jemelon Cotmaya, PO3 Thule Tahadlangit ug PO3 Gerardo Taboada nagbutyag nga ang biktima sayong nag-atiman sulod sa iyang karenderya.

Ang duha ka wala mailhing suspetsado nga nagsakay og motorsiklo mihunong sa karenderya ug nanganaog ug nagpakaaron ingnong mangaon usa kanila ang kalit mipusil sa biktima.

Yano ra usab mipahilayo sa lugar sakay sa motorsiklo paingon sa Proper Poblacion ang duha. Nakuha sa kapolisan ang basiyo sa kalibre .45 nga bala diha sa crime scene. – BANAT NEWS