Paglingkod ni Alcover babagan sa kaubanan

CEBU, Philippines - Dili gyud palingkuron sa mga miyembro sa Alliance for Nationalism and Democracy si partylist representative Pastor “Jun” Alcover karong Hunyo 30.

Si Paul Gabunales, nga nangangkong national president sa ANAD sa labing uwahi nilang general assembly mibutyag sa Banat News nga ilang babagan ang tinguha ni Alcover nga makalingkod og balik sa Kongreso.

Mipasangil kining usa ka “diktador” si Alcover ug wala na tinuoray nga nagrepresentar sa ilang partido ug nawala na ang adbokasiya sa demokrasya sa sulod sa ilang partido.

“Sa akong pagsabot, ang ANAD pro-democracy pero sukad nakalingkod si Alcover murag lain na ang iyang panan-aw…Wala na ko motuo sa naglingkod karong liderato sa Anad kay mura naman hinuon og diktadorya,” matud pa ni Gabunales sa pinulongang Tagalog.

Mipasangil si Gabunales nga nakadawat na siya og pagpanghulga lakip na ang ilang first nominee nga si David “Boy” Odilao tungod sa nahitabo karong pagkabuak sa partido.

“Tama na ‘yang pananakot, sobra na kaming naapi. Unsa naman diay ning Anad karon wala nay tingog ang party members?” pamahayag pa niini.

Niadtong Oktubre 2009, matud pang Gabunales mipatawag og consultative assembly si Alcover apan nahibulong na lang sila sa ilang pagtambong nga aduna nay set of officers nga wala paman sila mag-eleksyon.

Tungod niini ilahang gikwestyon ang maong bag-ong mga opisyales ug misuwat kang Alcover pagpahigayon og national assembly aron mopili og bag-ong set of officers ug nominees apan wala sila tagda niini.

Hinungdan nga isip bise presidente sa Luzon area mipatawag sila uban sa ubang lider sa Anad sa tibuok nasud og national general assembly sa Manila niadtong Marso ning tuiga ug diha nabotohan ang bag-ong set of officers sa Anad ingon man ilang mga nominees.

Mipasaka usab sila og petisyon ngadto sa Commission on Elections aron i-disqualify si Alcover gumikan sa pasangil nga gihimo na kining ‘family affair’ sa naulahi tungod kay pulos mga kaliwat niini ang gipangtudlong mga nominees.

Si Alcover dihang gikuhaan og reaksyon sa Banat News miingon nga walay legal nga basehanan ang petisyon batok kaniya ug wala siya mahulga sa bahad nga di siya palingkuron sa maong gihulagway niyang gipangtaktak na gikan sa partido.

“Ang pangutana kinsa man silang dili makapalingkod nako? Ako wala koy problema kay mahimo ra man ko maglulinghayaw o magnegosyo,” matud pa niini apan mipasidaan nga aduna siya’y mga sumusunod sukad pa kaniadto nga dili gyud motugot niini human matabangi sa partido gikan sa kalisod.

Matud pa niini nga dili matawag nga national general assembly ang gihimo nila ni Gabunales ug Odilao sa Manila gumikan kay wala marepresentahi ang tinuoray nga miyembro sa Anad sa tibuok nasud ug kun dili usab siguradong card-bearing members ang nanambong niini.

Giklaro usab ni Alcover ang isyu nga wala silay bank account sa partido, sumala pa niya walay bisan usa ka tawo nga mihatag og kwarta kundili iyahang kaugalingong bulsa ang iyang gikuhaan sa panggastos sa partido. “I spent my own money. I’ve never asked a single centavo ever since I am in Congress. I can tell you that with my head up high,” matud pa niini.

Gihimakak usab niyang siya maoy nagdiktar sa partido gumikan kay adunay konseho ug mga opisyales nga naghimo niini.

Gihagit niini ang mga kaatbang sa pagpakita og kamatuoran sama sa resibong dunay gi-deposit nga P10 milyones si Gabunales diha sa iyang bank account. – BANAT NEWS