CEBU, Philippines - Gitun-an sa kapolisan sa Cebu City Police Office kun ila bang pasakaan og kasong kriminal si Kamagayan barangay kapitan Celestino Avila base lamang sa impormasyong diha ang maong opisyal sa ‘hantakan’ sa iyang barangay dihang gironda kini sa mga sakop sa Investigation and Detection Management kon IDMB niadtong Lunes sa hapon.
Matud pa sa hepe sa CCPO Sr. Supt. Patrocinio Comendador nga base sa Presidential Decree No. 1602 Section E nga nagkanayon “(e)The penalty of temporary absolute disqualifications shall be imposed upon any barangay official who, with knowledge of the existence of a gambling house or place in his jurisdiction fails to abate the same or take action in connection therewith.”
Ang PD 1602 mao unyay basehan karun sa kapolisan sa kasong posible nilang mapasaka batok ni Avila.
Samtang sa pagkakarun ila nang giprepara ang report nga ilang iduso ngadto sa Department of Interior and Local Government lakip na niini ang mga ebidensya ilabi na ang hulagway nga nakuha sa kapolisan nga nagpakitang diha gyud ang kapitan atol sa pagronda.
Si Avila gisuwayan og tawag sa Banat News aron makuhaan og habig apan napakyas gihapon ang maong tinguha gumikan kay dili makontak ang telepono niini.
Apan ang iyang staff sa Gender and Development sa barangay nga si Baby Gestopa mibutyag nga daghan sila og mga pamaaging gibuhat aron lang mahunong ang mga ilegal nga sugal sa ilang barangay.
Lakip na niini ang personal nga pagbadlong sa mga tawong makit-an nilang nagsugal diha sa ilang dapit.Wala hinuon siya mokomento sa alegasyon sa kapolisan nga naatlang diha sa pag-raid si Avila sa maong hantakan.
Mipasabot usab si Gestopa nga anaa lang gyud kini sa tawo kun motuman ba sa balaod o dili. - BANAT NEWS