3 ka sitio sa Manipis peligro

CEBU, Philippines - Tulo ka sitio sa barangay Manipis, usa sa mga bukirang barangay sa dakbayan sa Talisay ang nameligro sa landslide panahon sa pagsugod sa La Niña phenomenon sumala pa sa barangay kapitan niini nga si Joselito Laurente.

Si Laurente sa pakighinabi niini sa Banat News mibutyag nga ang nameligro mao ang sitio Camp 5, Camp 6 ug Telepono nga delikado kun modahili ang yuta.

Ang yuta sa maong mga sitio nangliki karon tungod sa kainit sa panahon epekto sa El Niño Phenomenon ug kung mobundak ang kusog nga uwan masudlan kini og tubig nga mao unyay hinungdan sa pagdahili.

Gibutyag ni Laurente nga ang Manipis dunay sobra sa 800 ka pamilya ang nagpuyo sobra sa 400 niini ang naa diha sa nahisgutang tulo ka sitio.

Apan matud niini nga duna na silay giandam nga mga evacuation centers panagana sa higayon nga mahitabo gyud ang ilang gikahadlokan.

Ang giplanohan nilang evacuation center mao ang eskwelahan nga dunay 12 ka mga classroom ug sa barangay hall nga mapasilongan sa mga maapektahan unya.

Apan ang mga classroom ug barangay hall maokupahan sa 400 ka pamilya ug ang maong mga lawak saringan gamitonon na usab karong bulana sa pagsugod sa klase.

Sumala pa sa Philippine Atmospheric, Geophysical and Astronomical Services Administration hayan magsugod ang ting-ulan ug La Niña karong katapusan sa bulan sa Hunyo ug unang semana sa Hulyo.

Gipasidan-an ni Laurente ang mga molupyo nga magmabinantayon sa ilang palibot sa sugod na unya sa ting-ulan ug managana nang daan alang sa ilang seguridad.

Sa laing bahin, si Laurente mibutyag nga napulo na ka adlaw nga wala sila masuplayi og tubig tungod kay naguba ang fire truck nga maoy mosaka diha sa ilang dapit nga magdala og supply nga tubig.

Ang kapitan midugang nga diha una sila magsag-ob og tubig sa Camp 7 nga sakop na sa lungsod sa Minglanilla nga silingang barangay kini sa Manipis. - BANAT NEWS