Call Center Agent, papa giluba human mopalag sa 2 tulisan

CEBU, Philippines - Amahan ug anak niining babayeng call center agent gipangdunggab sa duha ka mga batan-ong tulisan diha sa sitio Timpolok, sa barangay Babag dakbayan sa Lapulapu kagahapon sa kaadlawon.

Ang mga biktima mao sila si Gia Lirazan, 20, call center agent sa MEPZ 2 ug ang amahan niining si Guillermo Lirazan, 52, pulos residente sa maong dapit.

 Sa imbestigasyon ni SPO2 Frederick Eslit sa Crime Against Persons Desk, gikan pa sa trabaho si Gia ug gisugat kini sa iyang amahan mga alas 4:15 kagahapon sa kaadlawon.

 Sa dihang naglakaw na kini padulong sa ilang panimalay duha ka batan-ong luwan og motorsiklo ang kalit nga mibabag sa ilang dalan ug ang usa niini mikanaog dayong tion sa usa ka kutsilyo ug mideklarar og tulis.

 Gumikan sa pagdumili ni Gia paghatag sa iyang bag, kalit kining gidunggab sa suspetsado sa dughan hinungdan nga midepensa ang amahan niini apan mao na usab ang gidunggab diha sa abaga.

Nakuha dayon sa tulisan ang bag sa dalaga nga may sulod nga P200 ug mga importanteng butang ug daling miikyas. Ang duha gidali og dala sa Lapulapu City Hospital ug luwas na sa makuyaw nga kahimtang. - BANAT NEWS