Power shortage sa Sugbu, KEPCO ug CEDC plants makatabang sa problema

CEBU, Philippines - Mipatawag og tigom sa mga power stakeholders si Gob. Gwendolyn Garcia nunot niining nagkagrabeng problema sa power supply sa lalawigan ug sa Central Visayas.

Mitambong sa tigum ang mga opisyales sa Department of Energy kon DOE, National Grid Corporation of the Philippines (NGCP), Visayan Electric Company (VECO), Cebu Electric Company (CEBECO), Cebu Energy Development Company(CEDC) ug uban pang mga independent power producers.

Ang regional director sa DOE nga si Antonio Labios mihatag og briefing ngadto sa gobernadora labot sa tinuoray nga sitwasyon karon sa mga power plant dinhi sa Sugbu ug sa Visayas.

Iyang gipahibawong ang hinungdan nga ang 390 ka megawatt nga kakulang sa power supply dinhi sa Visayas mao ang pagkapalyar sa mga planta sa mga dagkong power generators dinhi sa Sugbu ug sa Visayas tungod sa kakaraan na sa planta samtang ang uban gipaubos sa preventive maintenance.

Matud pa ni Labios nga maglisod og upgrade ang mga power producers sa ilang mga planta sanglit mahal man kaayo ang pagpalit og bag-o ug modernong kagamitan karon.

Sumala pang Labios nga ang hingpit nga pag-operate na lamang sa mga bag-ong power plant dinhi sa Sugbu sama sa Korean Electric Power Corporation (KEPCO) ug sa CEDC maoy bugtong paglaum nga masulbad ang halapad nga brownouts nga nasinati karon dinhi sa Sugbu ug sa Visayas.

Sa ilang bahin ang Assistant Vice President for Commercial Operation sa CEDC nga si Engr. Ed Satina nagkanayon nga pabiling wala pa maka-operate og balik ang ilang unit 1 sa ilang planta apan ang unit 2 nag-operate na sugod niadtong Mayo 21.

Matud pa niini, 60 ka megawatt ang ilang nahatag nga power supply ngadto sa NGCP ug VECO apan iyang gitataw nga dili kini paigo sa pagsulbad sa kakulang sa power supply karon.

Si Garcia miawhag sa ubang mga independent power producers nga angayang motabang sa pagsulbad sa maong suliran apil na ang ubang mga dagkong mga kompanya dinhi sa Sugbu pinaagi sa paggamit sa ilang mga power generators.

Gipaniguro sa gobernadora nga maka-operate na og balik ang napalong mga planta sa CEDC ug ingon man ang coal power plant sa KEPCO sa sunod nga tuig. - BANAT NEWS