CEBU, Philippines - Usa ka 33-anyos nga lalaki nga gidakop sa kapolisan human giingong nasuko dihang gisanta sa mga polis ang mga gidudahang drag-racers kagahapon sa kaadlawon diha sa national highway sa barangay Tungkop, lungsod sa Minglanilla.
Ang suspetsado mao si Ferne Vidal, residente sa barangay Inayagan, dakbayan sa Naga kinsa uban sa asawa niini nga motan-aw unta sa motorsiklong maglumba.
Si Chief Inspector Jovito Canlapan, hepe sa Minglanilla Police Station sa pakighinabi niini sa Banat News kagahapon mibutyag nga nakadawat sila og tawag gikan sa residente sa lugar kabahin sa lumba sa mga motor.
Ang ubang mga residente diha sa Minglanilla nahasol na niining lumba sa mga motor tungod kay mabalda ang ilang pagkatulog panahon sa gabii.
Sila si SPO1 Reynato Masangkay nakaakto sa grupo sa mga lalaking nagmotorsiklo nga nangandam na sa lumba hinungdan nga ilaha kining gibadlong ug gipangitaan og dokumento sa ilang mga motorsiklo.
Usa ka motorsiklong walay plate number ang giabandona sa tag-iya pagkakita sa mga polis hinungdan nga gi-impound kini sa mga polis. Samtang daghan pa ang nakaikyas ug misutoy padagan sa ilang motor.
Matud pa ni Canlapan nga si Vidal nasuko sa mga polis ug nangisog ug gihagad pa og sukmagay si PO1 Raymund Romares, tungod niini gisikop siya ug gipaslak sa karsel bisan pa sa pagkisi-kisi niini ug sa iyang asawa. Si Vidal gikatakdang pasakaan og kasong “disobedience” sa mga polis apan dili lang nila apilon sa pagpasaka og kaso ang asawa niini tungod sa “humanitarian reason.”
Si Canlapan midugang nga kasagaran maglumba ang mga motor sa nahisgutang lugar ug matapos ngadto sa dakbayan sa Naga (boundary sa Minglanilla) ug silang mga polis lang maoy bantayan sa mga drag-racers. (BANATNEWS)