Tancinco ikiha'g qualified theft

CEBU, Philippines - Ang tigpamaba sa Kapitolyo nga si Atty. Rory Jon Sepulveda mibahad ngadto kang City Traffic Office Management Executive Officer Arnel Tancinco nga maoy pasakaan og kasong qualified theft ngadto sa korte kun dili ipagawas sa impounding area ang trailer flat bed nga giguroy gikan sa lote sa Kapitolyo sa may Fuente Osmeña ning siyudad nga gipanag-iya sa probinsiya sa Kapitolyo. Matud pa ni Sepulveda sa interbyu sa DyRF nga kun mas labaw pa sa balaod ang Citom dili sila makapugong kang Tancinco nga dili motuo sa ilang gidusong proof of ownership sa trailer flat bed ug land title nga propiyedad kini sa Kapitolyo.

Apan giklaro niining dili usab sila mapugngan sa pagsang-at og kaso batok kang Tancinco lamang ug dili ang mga opisyales sa siyudad sa Sugbu.

Si Sepulveda miingon nga ang Provincial Legal Office mihatag kutob Biyernes kang Tancinco sa pag-uli sa maong trailer sa lugar diin nila kini gikuha.

Gipahibawo niini nga dili masakit ang Kapitolyo kun masubasta ang maong trailer flat bed tungod kay gi-junk na man nila kini hinungdan gani nga wala na kini girehistro og balik.

“If he will pursue that go ahead, kun ang mipasiatab nga molaban nimo will no longer be a city mayor. Tan-awon ta kun simbako di ba siya madutlan,” sigon pa ni Sepulveda nga nagtumbok ngadto kang Mayor Tomas Osmeña.

Si Tancinco sa iyang bahin mipadayag nga wala siya mahadlok sa kiha unya batok kaniya kay igo ra siyang naghimo sa iyang trabaho.

Gipasabot hinuon ni Tancinco nga klaro kaayo sa ilang dokumento nga nakalapas gyud sa traffic ordinance sa siyudad ang pagbuta’g sa maong trailer flat bed sanglit ang gibabagan niining dalan sa Don Mariano Cui karaan naman nga dalan bisan og gipanag-iya pa kini sa Kapitolyo. (BANATNEWS)