Quovadis Beach Resort way lifeguard

CEBU, Philippines - Mopadala og sulat ang hepe sa kapolisan sa lalawigan nga si Sr. Supt. Erson Digal ngadto sa buhatan sa Department of Tourism nunot sa nahitabong pagkalumos patay sa usa ka Koreano samtang naligo sa swimming pool sa Quovadis Beach Resort nga nahimutang sa Panagsama barangay Basdiot sa lungsod sa Moalboal niadtong Domingo.

Si Digal nagkanayon nga sumala pa sa report sa iyang hepe sa kapolisan sa Moalboal nasutang walay lifeguards ang maong resort nga mao untay mobantay sa seguridad sa ilang mga lokal ug langyaw’ng turista nga mangaligo.

Sa nasayran usa ka Deok Ki An, 28, lumad nga taga Kangdong, Seoul, South Korea ang nalumos patay niadtong Domingo.

Matud ni Digal nga wala magbutang og lifeguard ang tagdumala sa maong beach resort tungod sa rason nga magdoble na sila og suweldo kung mag-hire pa sila niini ug ang ilaha nalang security guard maoy magbantay sa ilang mga guest.

“I made a report sa Department of Tourism, bahin aning hitaboa,.. there should be a lifeguard kay nalumos ang Korean national walay mitabang ug naa pa’to sila’y lifeguard mao untay motabang sa biktima,” pasabot pang Digal.

Iya usab iapil sa iyang sulat ngadto sa Department of Tourism nga awhagon ang ubang resort owners nga magbutang gyud og lifeguard sa ilang resorts. (BANATNEWS)