Duha ka oras na ang brownout - Veco

CEBU, Philippines - Dugang pas-anong kahasol ang matagamtaman sa mga konsumidor sa kuryente human gihimo nang duha ka oras ang ipatumang rotation brownout sa Visayan Electric Company sa ilang franchise area.

Ang tigpamaba sa VECO Ethel Natera nipahibawo kagahapon pinaagi sa text message sa paghimong duha ka oras sa ipatuman nga rotation brownout matag adlaw dinhi sa Metro Cebu.

Gipasabot ni Natera nga tungod kini sa nagsaka nga demand apan nagkanihit lamang sa supply sa kuryenteng madawat sa VECO gikan sa mga power suppliers niini hinungdan nga nakab-ot ang desisyon nga ingon niini aron pagminus sa epekto sa kakuwang sa supply.

Gani sukad kagahapon gipahibawo ni Natera nga miabot na og 260 megawatts ang kakuwangan sa supply sa kuryente sa Cebu-Negros-Panay Grid ug tungod niini gi-awhag sila sa National Grid Corporation of the Philippines kon NGCP nga mo-share niini pinaagi sa pagpahigayon og service power interruption nga moabot ngadto sa 90 megawatts.

Si Natera miawhag sa mga konsumidor pagsusi sa website sa VECO ang www.veco.com.ph aron makakuha og kinatibuk-ang detalye sa naka-schedule nga mga lugar nga makasinati og rotation brownout matag adlaw.

Nunot niini mi-apelar ang VECO ngadto sa publiko sa pagsabot sa maong kakulian nga padayon pa karung gipangitaan og paagi aron hingpit nga masulbad ang maong kakulangon sa supply sa kuryente.   (BANATNEWS)