CEBU, Philippines - Nahadlok nang mobalik sa iyang trabaho ang security guard sa Vista Grande nga mipasangil nga gitionan og armas sa sinagop ni Talisay City Mayor Socrates Fernandez nga si Joavan Fernandez niadtong Sabado.
Si Clito Dandan, 44, taga Tabunok, sakop sa K&l Diamond Security Agency miadto sa DySS kagahapon sa buntag aron magpatabang sa iyang seguridad tungod kay matud pa sa biktima nga nagbalik-balik si Joavan sa iyang gitrabahoan ug nagpunay og pangita kaniya.
Tungod niini wala nalang una siya mouli sa ilang balay tungod sa kahadlok nga nagpunay pangita kaniya ang anak sa mayor.
Giasoy sa biktima nga niadtong Huwebes sa kaadlawon samtang siya maoy guard on duty niadtong higayona iyang gisultihan si Joavan nga dili na pasudlon ang motorsiklo kay nangreklamo ang mga namuyo nga ipabadlong ang anak sa mayor kay labihang sabaa sa motor.
Matud ni Dandan nga sa pagka-Sabado mibalik na usab si Joavan ug gihulga siyang pusilon ug mition kaniya og pistola.
Tungod sa iyang kahadlok iyang gisumbong sa presidente sa Vista Grande nga si Derly Andersonn kinsa mitambag kaniyang isumbong sa barangay ug pagkahuman ipa-blotter sa kapolisan.
Gipadayag usab niyang dili na siya mo-report sa iyang trabaho tungod sa pagpunay pangita ni Joavan kaniya. Dili usab siya interesadong mosang-at pa og reklamo batok kang Joavan kay usa lamang siya ka kabus ug walay ikasuporta sa kaso unya gawas pa niini malangan pa gyud siya.
Giklaro niining wala siya’y sala nga nahimo kang Joavan tungod kay igo lamang siya nagtuman sa iyang trabaho isip gwardya ug dunay gibuhing upat ka mga anak.
Sa iyang bahin si Sr. Supt. Erson Digal mimando kang Supt. Elmer Lim, hepe sa kapolisan sa dakbayan sa Talisay nga monitoron ang mga lakaw ni Joavan aron madakpan kini kun magdala og armas.
Gihulagway ni Digal nga panggulat lang gihimo ni Joavan sa usa ka tawong walay ikasarang pagsukol. Nagtuo usab si Digal nga dili lang kini maoy katapusang higayon nga ireklamo si Joavan.
“Depende ra na niya (Joavan) kung mosukol siya sa mga polis ini’g dakop,” matud pang Digal.
Iyang giawhag ang gwardya nga dili moatras ug mosang-at gyud og kaso batok kang Joavan aron kun malutsan og warrant ila dayon kining dakpon. (BANATNEWS)