Polis may lead na sa migulgol sa driver

CEBU, Philippines - Aduna nay lead ang kapolisan sa Mandaue sa mipatay sa taxi driver nga gigulgol sa milabay’ng adlaw diha sa sitio Basbas sa barangay Pagsabungan sa nahisgutang lugar.

Matud pa ni Mandaue City Police Office OIC director Sr. Supt. Noel Guillamac nakakuha na og lead ang Intelligence and Detective Management Branch subay sa tulo ka mga saksing ilang nakuhaan og mga pamahayag. Ang taxi driver nga si Eliezer Parilla napalgang patay sa backseat sulod sa iyang taxi unit sa milabay’ng petsa 23 ning bulana nga may ginulgulan sa liog, wala na diha ang iyang pitaka ug cellphone.

Base sa mga pamahayag sa mga saksi nga atol sa hitabo aduna sila’y nakit-ang duha ka mga tawong nanakay og motorsiklo pahilayo sa maong dapit human ibilin ang taxi.

Gumikan niini nagduda si Guillamac nga posibleng si Parella gipatay kini sa laing dapit ug ang mga suspetsado maoy midala sa patay’ng lawas samtang ang back up nga motorsiklo nagsunod.

Duna usab sila’y laing version sa laing saksi nga posibleng nagpuyo ra sa maong barangay ang mga tulisan. - BANAT NEWS