CEBU, Philippines - Mipiti ang nawong sa usa ka polis dihang gisumbag kini sa usa ka tawong hubog didto sa barangay Biasong, dakbayan sa Talisay sa miaging Sabado sa gabii.
Ang biktima mao si SPO2 Delicio Esconde, nga taga Biasong, apan nadestino sa Alcoy Police Station , samtang ang suspetsado mao usab si Saturnino Tante Jr., taga dalan Private, Urgello, dakbayan sa Sugbo.
Base sa imbestigasyon ni SPO1 Oliver Dacua sa Talisay City Police Station, nasayran nga nagbarogbarog ang biktima duol sa balay sa silingang higala niini, dihang kalit lang nahiabot si Tante kinsa namiyesta niadtong tungora sa maong lugar ug lasbag na kaayo sa alak.
Unya unsay nakaon niini nga matud pa gipikhan man og kalit sa iyang kumo ang nawong sa biktima, kinsa wala gayud makabantay gumikan sa kakalit sa hitabo.
Maayong pagka-igo ug mipiti ang nawong sa polis nga nasabak sa kinumo ni Tante kinsa midagan dayon human og panumbag.
Gipa-blotter lang sa biktima ang nahitabo kaniya samtang wala lang ipadakop ang suspetsado. - BANAT NEWS