May suspek na ang kapolisan sa milut-hang sa apprentice

CEBU, Philippines - Ang kapolisan sa lungsod sa San Fernando may gipanid-an na karong suspetsado nga mipusil sa usa ka apprentice sa barko sa Trigon Shipyard sa sitio Suba, barangay Sangat, sa maong lungsod niadtong Biyernes sa kaadlawon.

Si SPO1 Francisco Salubre sa San Fernando Police Station sa pakighinabi sa Banat News kagahapon mibutyag nga base sa gipahigayong follow-up nga imbestigasyon sa iyang mga kauban, ang suspetsadong mipusil kang Armando Ecla Jr., 27, usa ka apprentice sa M/V Kathrine nailhan lang sa ngalang “Tata”.

Gituohan nga ang suspetsado maoy kunsabo sa giingong pagpalusot og krudo sa barko nga nagpundo diha sa Trigon shipyard sa usa ka kanhi kawani kinsa gipapahawa human masakpi sa maong palusot.

Apan matud ni Salubre nga wala siya makakuha sa ngalan sa kawani nga gipapahawa.

Midugang si Salubre nga base sa ilang nahipos nga report, ang nahisgutang kawani may gikasabot nga tawo nga ilang gituohang si Tata nga maoy mopalit unta sa krudo nga iyang ipalusot.

Ang nahisgutang tawo mibayad na kuno og P4,000 ngadto sa maong kawani bugti sa krudo nga ipalusot unta niini, apan gidimalas kay nasakpan ug napapha kini sa trabaho.

Sa adlaw sa ilang sabot nga mobalik ang tawo aron kuhaon na ang krudo misaka kini sa barko apan tungod kay wala makaila kaniya ang ubang mga tripulante sa barko, gitabangan siya og puspos sa pagtuo nga siya usa ka kawatan.

Gituohan sa kapolisan nga gumikan sa kalagot ug kapungot sa maong tawo , mibalik kini niadtong Biyernes sa kaadlawon nga nagsakay og pump boat ug dihang nakita si Ecla mao kini gibirahan sa iyang armas de fuego.

Si Ecla anaa pa karon sa tambalanan. (BANAT NEWS)