Text nabasahan sa mama: Dalagita gi-rape sa uyab

CEBU, Philippines - Midangop ang usa ka inahan sa kapolisan sa station 5 sa Mandaue City Police Office ug mitug-ang gilugos sa usa ka 16-anyos nga uyab ang iyang anak diha sa dakbayan sa Mandaue.

Ang biktima usa ka 15-anyos nga dalagita nga taga barangay Hipodromo dakbayan sa Sugbu ug ang gitumbok nga nanglugos mao ang usa ka 16-anyos nga lalaki nga residente sa barangay Looc dakbayan sa Mandaue.

Base sa pamahayag sa inahan ngadto sa kapolisan nahibulong siya sa kausaban sa nilihukan sa iyang anak diin misamot ang iyang pagduda sa dihang iyang nabasahan sa cellphone sa iyang anak ang text sa uyab niini nga nag-ingong “Iinom lang na og soft drinks ug tambal mawagtang ra na.”

Sa dihang iyang gisita ang anak kini mitug-an nga gipugos siya sa pakighilawas sa iyang uyab nga 16-anyos didto sa ilang panimalay.

Gumikan niini midangop sa kapolisan ang inahan alang sa pagpasaka og kasong pagpanglugos batok sa 16-anyos nga lalaki.

Atol sa imbestigasyon sa Women’s and Children’s Desk sa Station 5 ang 15-anyos misaysay nga gidala siya sa panimalay sa iyang uyab ug gikatahong mipadayag nga buot niining makighilawas kaniya apan wala siya mosugot.

Sa dihang buot na kining mouli gipugngan kini sa lalaki hangtod nga nahitabo ang paglugos kaniya.

Ang 16-anyos nga suspek gisikop sa kapolisan apan gitugyan ngadto sa Department of Social Welfare and Development ang kustodiya samtang gihikay pa ang kaso. (BANAT NEWS)