Work stoppage sa nahugnong edipisyo gilibkas

CEBU, Philippines - Gilibkas na sa Department of Labor and Employment (DOLE) ang ilang work stoppage order batok sa DCD Construction nga maoy nagtrabaho sa building expansion project sa Aegis People Support sa Asia Town IT Park kansang bahin sa edipisyo nahugno ug miangol og duha niadtong bulan sa Abril.

Si DOLE Central Visayas director Elias Cayanong nagkanayon nga ilang gilibkas ang work stoppage order dihang nakita nga ang contractor nakatuman na sa ilang safety measures.

Matud pa ni Cayanong nga ang paglibkas sa kamanduan gibase sa resulta sa subsob nga inspeksyon sa ilang mga safety inspectors nga kanunay nga mitan-aw sa contractor sa nahugnong building.

Si Cayanong miingon nga ang iyang buhatan natagbaw sa gihimong safety measures sa kontraktor pagsiguro nga dili na masubli pa ang maong aksidente.

Apan iyang gitataw sa director sa DOLE-7 nga magpadayon sila sa pag-monitor sa nahisgutang construction company apil na ang saktong benepisyo sa mga construction workers.

Kini sama sa ilang gihimo ngadto sa CYC Construction nga maoy kontraktor sa nahugnong building sa barangay Tisa ning siyudad sa Sugbu nga mipatay og lima ka mga construction workers ug miangol og unom. (BANAT NEWS)